વિશાળતા ...

વિશાળતાને ન કોર ન ધાર

અસીમ અવિરત અફાટ!

વિશાળતાને ન ઘાટ ન ઘડાવ

અનંતે ભળવા આતુર પસાર...

વિશાળતાને ન પ્રકાર ન ફાટ 

તત્વઅસ્તિત્વ અનેરું અગાઢ.

વિશાળતાને ન વધઘટનું બાંધ 

સરળ સહજ વિસ્તરણ સ્વભાવ.

વિશાળતાને ન ક્યારી ન પ્યાસ

શાંત સ્થિત સમવિષ્ટ સ્વીકાર...

વિશાળતા અનંતને જોડતો પસાર છે અને એટલે જ એમાં વિધીવત સ્વીકાર છે.

એ પોતે જ પોતાનું ખેંચાણ છે. ખેંચાખેંચ વગર હળવે હળવે વધતો ફેલાવ છે.

પ્રભાવોથી પરે, સ્વયંનો એવો સ્વભાવ છે કે સ્પર્શતું સર્વ કંઈ અંગીકાર છે, ને વધુ વિશાળતા તરફનું પ્રયાણ છે.

એ ઘાટ, આકાર, ઊંડાણ ને ખોલી નાંખતો અહેસાસ છે અને પછી બંધનો ઘેરી લેતો, એની ફરતે ફરી વળતો ઓગાળ છે.

શાશ્વતને બાથ ભરવા દોડતો નિરંતરનો પ્રભાવશાળી પ્રયાસ છે...

ખરું પ્રભુ!

આભાર...

- મોરલી પંડ્યા 

મે, ૨૦૧૮

Flower Name: Parkinsonia aculeata
Jerusalem thorn, Mexican palo verde

Significance: Lightness
Charming