આવતી ઘડીથી...

આવતી ઘડીથી બેખબર

ને કાલનું શું યોજન કરવું?

બધું જ નક્કી, નિશ્ચિત છે 

ને ઘડી ઘડી ને શું ઘડવું?

આ ઘડી, ઘડાઈ આજની

ને આગળપાછળ શું જોડવું?

એમ જ બધી હારમાળ છે

ને કસી કસી ને શું મેળવું?

'સકટના ભારનો શ્વાન' 

સોંપ્યું, મૂક્યું તેવું સમજાયું!

બધું જ નિર્મિત કડીબદ્ધ છે

ને મનનાં મનથી શું મંડવું?

ભાગે પડતું જે છે એ છે

નસીબને આધારે શું છોડવું?

કર્મો જ રણકતાં બોલે 'મોરલી'

તે પળનાં સમેટી કેમ ન છૂટવું?

આભારી...પ્રભુ!

- મોરલી પંડ્યા

ફેબ્રુઆરી, ૨૦૧૬