તફાવત તો જુઓ!

પ્રકૃતિ અને આત્મા ...

વચ્ચે તફાવત તો જુઓ! 

થકી ક્ષમતા અને સ્થાન!

પ્રકૃતિ કહે:

"ક્ષણિક છે આ સુખ ને ખુશી ભાવ

દર હાસ્ય પાછળ વસે રુદન પીડામય ક્યાંક!"

આત્મા કહે:

"શાશ્વત છે આનંદ એને અનંત રીતે પિછાણ 

દર ક્ષણ છે હાસ્યજનક ને કૃપા પરિણામ."

પ્રકૃતિ કહે:

સાશંક રહેવું સતત અદલાબદલી અહીં ખાસ,

"આ આવ્યું, એટલે જવાનું" ન રહેવું બેધ્યાન!

આત્મા કહે:

"તું સનાતન, કારણ સનાતનની પેદાશ,

નિશ્ચિંતપણે શ્રદ્ધા વિશ્વાસે મક્કમ ડગે ચાલ."

પ્રકૃતિ કહે:

"હું જ છું સર્વોપરી, મારે નિર્ભર છે માનવજાત,

માયા, મિથ્યા ગમે તે કહે, રમતમાં ઉલઝાવું જીવનજાળ!"

આત્મા કહે:

"હે દેહધારી! તું છે સાધન સર્વોચ્ચ, ભીતરથી જીવન જાણ,

પ્રકૃતિને પણ પલટાવ શક્તિરૂપ ને અણનમ ડગે દિવ્ય ઉતાર"

બંનેનાં લક્ષ, અભિગમમાં કેટલો અંતરાવ!

ક્યાં પ્રકૃતિની એની એ જ પુનરાવર્તિત લઢણ!

ક્યાં આત્માની પરિવર્તનકારી શાશ્વતી ઢાલ!

પ્રભુ! ખરી દીધી તેં માનવજાતને ભેટસોગાદ!

જૂલાઈ ૨૦૧૯

Flower Name: Viscum album

Mistletoe

Significance: Sign of the Spirit

The Spirit says, “I am here”.