આ લખાય છે...

આ લખાય છે એમાં કોઈ ‘હું’ નથી,

કે વંચાય છે એ શબ્દો ‘મારાં’ નથી,

આધ્યાત્મિકતા એ કોઈ વ્યક્તિની આવડત નથી,

કે કોઈ સામાન્ય બુદ્ધિનું પરિણામ નથી,

આ તો અગોચરથી ગોચરમાં અવતરતી ચેતના યાત્રા છે,

એમાં કોઈ ઊણપ-કચવાટને સ્થાન નથી...

આધ્યાત્મિકતા ભગવો મુખોટો નથી,

કે સંસાર નિષ્ફળ ભાગેડુનો પ્રતિશોધ નથી,

આ તો અભિગમ, વલણ, આચરણનો સમન્વય છે,

એમાં કોઈ પાપ-પુણ્ય-પ્રપંચનો માર્ગ નથી...

આધ્યાત્મિકતા, એ જાત-પ્રસંશકને વેગ નથી,

કે જાત-કેન્દ્રિતને ભેટ નથી,

આમાં તો જાત-શુધ્ધિથી જાત-ખોજની સફર છે,

એમાં કોઈ ટૂંકો-આડોઅવળો ‘મોરલી’ ફાંટો નથી…

- મોરલી પંડ્યા

સપ્ટેમ્બર ૧૩, ૨૦૧૪