તમ સત્સંગનો સ્વાદ...

 પ્રભુ તમ સત્સંગનો સ્વાદ મીઠો લાગે ને ચરણઅર્પણમાં હળવાશ લાગે.

અંતઃસ્થ સ્થાન તમ ચૈતન્ય-સત્ય સભર ને તમ સંગે જીવન સફળ લાગે.

આવતું સર્વ કાર્ય તમ અર્ચન, એની ગતિ-પ્રગતિ તમ પ્રસાદ લાગે.

પ્રત્યેક વિગત તમ સંગતિ, ને આવનાર દર ઘડી તમ પૂજન લાગે.

નિતનવીન ક્ષણ તમ ભેટ ને કરવાનું સર્વ, તમ સૂચન-વિધાન લાગે.

વણઉકલ્યાં કામ તમ દૂરંદેશી ને નિપટતાં એક એક તમ કૃપાદ્રષ્ટિ લાગે.

સંસાર, ખેલાતી તમ મસ્તી ને જન્મ-મરણનાં ચક્રમાં તમ હસ્તી લાગે.

છોડીને ચાલતો દરેક તમ સાથી ને સ્વબળે વધતો, અટૂલો તમ પ્રાર્થી લાગે.

ચારેકોર તમ વૃષ્ટિ-સૃષ્ટિ ને અનંતોમાં વહેતી વૃદ્ધિ તમ સુ-કૃતિ લાગે.

જીંદગીઓ હોવામાં અમી દ્રષ્ટિ ને દરેક જીવ, સજીવ-નિર્જીવ સ્વીકૃતી લાગે.

સમર્પિત સ્વરૂપમાં પ્રભુ તમ ભક્તિ ને કરુણામય હ્રદયમાં તમ નિવાસ લાગે.

જોજનો, યુગોમાં તમ ચેતના ને સર્વ તમ પ્રકાશની ‘મોરલી’ ને ઊત્પત્તિ લાગે.

નતમસ્તક નમન!

- મોરલી પંડ્યા

ઓક્ટોબર ૨૪, ૨૦૧૪