મા, તું જ ...

મા, તું જ ...
આ બે વિરુધ્ધ છેડાઓ તું જ ભેગા જોડીશ.
ધરતી ને આભનાં તથ્યોને તું જ સાંધીશ.

મા, તું જ ...
ઊર્ધ્વપ્રકાશનાં સત્યોને અહીં ઊતારીશ.
હકીકત બનાવી પૃથ્વીસ્તરમાં સ્થાપિશ.

મા, તું જ ...
ગુહ્યતત્વોને માનવજીવનમાં સમાવીશ.
એકએકને સશક્ત કિરણોમાં ઊજાળીશ.

મા, તું જ ...
મનપ્રાણકોષોનાં મૂળભુત સ્વભાવ દઈશ.
સ્વસ્થ મૂલ્યો,આમૂલ પરિવર્તન આપીશ.

મા, તું જ ...
બુદ્ધિ-શરીરનાં ઢાંચાં-બાંધાં ખુલતાં રાખીશ.
યોગ્ય ઊપયોગમાં જણ પ્રભુમય બનાવીશ.

મા, તું જ ...
વિઘ્નવિરોધ ભેદછેદ સામદામ ઓગાળીશ.
પ્રેમહેત કરુણાપ્રભુતા જ્ઞાનધ્યાન જ રાખીશ.

મા, તું જ ...
અભિપ્સાને માર્ગે  માનવક્ષમતા વધારીશ.
સમર્પણમાં એને જ પાછી અતિક્રમી જઈશ.

મા, તું જ ...
'મા' આ અદભૂત દર્શન! 'મોરલી' વંદન...

- મોરલી પંડ્યા

જુન ૧૩, ૨૦૧૫