પ્રભુ... ભ્રમ માની...

પ્રભુ...

ભ્રમ માની ને ભાગવું નથી,

નેતીનેતીમાં ખપાવવું નથી,

આ વિશ્વ આમ મન આંખેથી

માન્યતામાં સમાવવું નથી.

વૈશ્વિકપડળમાં ખોવાવું નથી,

ખુલ્લી કુદરતમાં ગભરાવું નથી,

આ વિશ્વ આમ ડર પ્રભાવથી

ખુણો ધરીને પતાવવું નથી.

બ્રહ્મસ્થાનને નકારવું નથી,

સ્પર્શ ગુમાવીને સંભાળવું નથી,

આ વિશ્વ આમ પસંદબાજીથી

શોગટા-ચાલમાં રમાડવું નથી.

પ્રભુ કાયદો કોઈ કઠોર નથી,

કસોટી-ચુકાદાની હારમાળ નથી,

આ વિશ્વ આમ ઊકલતી ગુંથણી,

 દોષારોપણમાં રીબાવવું નથી.

અસંખ્ય શક્યતાઓ એળે નથી,

જીવન મળવું, મળ્યું વ્યર્થ નથી,

આ વિશ્વ આમ અનંત 'મોરલી' 

પ્રભુઅવસ્થા વિના જીવાતું નથી.

- મોરલી પંડ્યા

ડિસેમ્બર, ૨૦૧૫