છે પ્રેમવિયોગી...

જ્ઞાની બુદ્ધિ, સૂકો ભેખ ઊધારી,

કળ-બળ ધારી, જડ બેદરકારી,

સમતા શાણી પણ ઊંડે અશાંતિ,

ભાગવૃત્તિ ને મૌન સમજયુક્તિ,

સખ્ત જીવનશૈલી, પરહેજ ભુક્તિ,

પસંદ-નાપસંદ અગ્રણી, સ્વકેન્દ્રી,

બાંધછોડ બાદબાકી, ઠેઠ ફરિયાદી,

ઠેસ, ઠોકર દેતો,  વૈરી ઉપભોગી,

મનોદશાનો સ્વામી, ભાવ વિરોધી,

તપસ્વી રીતિ, નીતિ મનવૈરાગી, 

માનજો, સપડાયો એ ઇચ્છાભોગી,

પ્રેમથી લેજો 'મોરલી', છે પ્રેમવિયોગી.

પ્રભુ... પ્રભુ...

કડક શબ્દો ઊતર્યા છે આ વ્યક્તવ્યમાં...
તાત્પર્ય કંઈક વિશેષ છે.

સખત વિપરીત અને વિકટ ભાવ,  સ્વભાવ પાછળ કોઈ સાદો પ્રેમ ખૂટતો નથી હોતો....

એ અઘરાં પેચીદા વ્યવહાર અને વર્તન નો પ્રભુપ્રેમ જ લેપ બની શકે છે.

તો પછી આમ,  આવા માણસો કેમ?

દરેક ઘડતર,  ગણતર,  ભણતર પક્વ થાય પછી જ આગલા સ્તર પર વૃધ્ધિ પામી શકે છે.

એનાથી જ એ સર્વાંગવિકાસને જે તે સ્તરે સ્થાયી બનાવી સ્થાપિત કરી શકે છે.

બીજમાંથી અંકુરિત થઈને ઘટાદાર વૃક્ષ અને ફળદ્રુપ થવું એ પણ વિકાસ પામતી ગતિને જ આભારી છે.

દરેક રુક્ષતા, જે હ્રદયને સૂકુ રાખવાનું કામ ધરીને બેઠી હોય છે,  એ પેલાં પ્રેમને આહવાન છે.

જેમ પ્રેમીમાં પ્રભુચહેરો દેખાય છે એમ એનાં વિરુધ્ધમાં એ જ ચહેરો જોવાની કુશળતા લાવવાની હોય છે.

સ્વીકારવું એ પ્રેમી હ્રદયને પોષણ છે. અને એ જ બીજા છેડાની ઔષધિ છે.

પ્રેમ પણ પ્રભુ જ આપે અને પ્રેમી થતાં પણ એ જ શીખવે એ જ પ્રભુતા...

પ્રણામ...

- મોરલી પંડ્યા
ઓક્ટોબર, ૨૦૧૬

Flower Name: Petrea volubilis
Purple wreath, Sandpaper, Queens-wreath, Bluebird vine
Significance: Spiritual Power of Healing
Opening and receptivity to the Divine influence.