પ્રભુ, તમને અર્પણ કરેલુ

પ્રભુ, તમને અર્પણ કરેલુ ક્યાં એળે જાય છે,

આધાર પક્વ થતા બેવડું-બહોળું થઈ ફેલાય છે,

તમારી કૃપા તો છે અવિરત-અનંત,

મગજથી એને ક્યાં સમજાય  કે પહોંચાય છે….

તમે આપેલું ક્યાં પાછુ કે કોઈનું થાય છે,

ડહાપણ સાથે પચે ને અસ્તિત્વ માં ઝીલાય છે,

તમારી કૃપા તો છે અવિરત-અનંત,

સમય પહેલાં એનેય ક્યાં સમજાય કે પહોંચાય છે….

તમારા આપેલા આ શબ્દો ક્યાં વ્યર્થ લખાય છે,

હ્રદયમાંથી ઊગે ને નમ્રભાવથી સ્વીકારાય છે,

તમારી કૃપા તો છે અવિરત-અનંત,

અહોભાવ વગર એનેય ક્યાં સમજાય કે પહોંચાય છે….

પ્રભુ, તમારી મરજી વગર કશુંય ક્યાં મેળે થાય છે,

તમ સાથ છે તો આ, આ ઘડીમાં જીવાય છે,

તમારી કૃપા તો છે અવિરત-અનંત પ્રભુ,

આ અમૂલ્ય ક્ષણમાં, અંતરતમનો આભાર ‘મોરલી’ને સમજાય છે…..

          - મોરલી પંડ્યા

            જાન્યુઆરી ૧૧, ૨૦૧૪