... તો ક્યાંથી સર્વત્રતા?

ન ઊગે ન આથમે! તો ક્યાંની ભ્રમણ-કક્ષા?

ન ભળે ન ઉદ્દભવે! તો ક્યાં ભાવ-સરિતા?

ન સ્પર્શે ન સરકે! તો શેનાં મીણ-લિસોટા?

ન સુવાસે ન ખરે ! તો કેવી પુષ્પ-લતા?

ન ડસે ન રુઝવે! તો શાની કંટ-વ્યથા?

ન રીસે ન ઊભટે! તો કેમ પ્રીત-તાપણાં?

ન વાતે ન મૌને! તો કોણ વિરુદ્ધ, છેટાં?

ન અગ્રે ન અંતે! તો શું અધવચ-મૂંઝારા?

ન ખૂંપે ન ખૂંચે! તો ક્યાંનાં ઘાવ ઘૂંટડા?

ન તટે ન ટોચે! તો કેવાં તળ-તાળવા?

ન સંસારે ન સારે! તો કોની સ્વ-ગાથા?

ન અત્રે ન તત્રે! તો ક્યાંથી સર્વત્રતા?

પ્રકૃતિનાં અનેક રૂપ અને દરેકનો નોખો સ્વભાવ...

મનુષ્ય બુદ્ધિએ પોતાની સુગમતા માટે દરેકને બે છેડાં, કહો કે બે અગ્રિમતા વચ્ચે જે તે ને સમાવી લીધાં અને સ્વ-ભાવ બદ્ધ કરી લીધાં. 

વ્યાખ્યા આપી એટલે સીમિત કરી નાખ્યાં. ઓળખનાં પરીઘ ચીતરી દીધાં. સામુહિક સમજમાં એને સ્વીકૃતિ અપાવી. 

પણ શું દરેક વ્યાખ્યાયિત એટલું જ હોય છે?

પડકાર અને અનુભવનો સ્વાદ બંને એ સીમાઓમાં કેદ સમજને ખુલ્લાં દ્વાર આપે છે અને સમજની સીમાઓને વિસ્તૃત કરે છે. 

જો 'આ' કે 'તે' એમ જ ગણવાનું હોય તો સમસ્તતા સુધી કેવી રીતે પહોંચી શકાય.

સર્વાંગ સમગ્રતા સમસ્તને સમાવતી હોવી રહી...નહીં તો એને પણ સર્વોપરી હજી કશુંક હોવું રહ્યું!

કુદરતને કરામત આપનાર!

સાદર...

- મોરલી પંડ્યા 

જૂલાઈ, ૨૦૧૭

Flower Name: Virginia verschaffeltii

Nerve plant, Silver net plant, Silver Virginia, Silver nerve

Significance: Application

Modest but harmonious.