પ્રભુનાં પ્રદેશમાં...

પ્રભુનાં પ્રદેશમાં કશું, ક્યાંય જતું નથી,

સાચા-ચોખ્ખા થઈ આપેલું ક્યાંય નડતું નથી…

પછી તો પ્રભુ છે જ, રોકી લે છે સહુ સંઘર્ષ-ઘર્ષણ,

આપવાના ભાવથી આપેલું, અનેકગણું થયા વગર રહેતું નથી…

આ તો ચેતના છે પ્રભુ કેરી! સમત્ત્વ સમજાયા વગર રહેતું નથી,

ફક્ત; મનઘડંત કે પ્રાણપર્યંત કશું મળતું નથી…

માણસ તો નિમ્ન! ભટકતો, ભૂલતો!

અર્પણ મહત્તમ! એ સિવાય કોઈ લક્ષ્યાંક જીવાતું નથી…

કોઈ ગમે તે ધારે, ઈચ્છે! કંઈકનું કંઈક - એક નહીં તો બીજું - યોજે,

અહીં પ્રભુ નિર્મિત સિવાય કશું બનતું નથી…

ચિંધશે રાહ, દેશે ઊત્ત્થાન ને પામશે ઊન્નતિ, એ જણ ને જીવતર!

પ્રભુપ્રદેશમાં બધું બસ! ઊભરાતું, ‘મોરલી’ કશું ક્યારેય ખૂટતું નથી…

-         મોરલી પંડ્યા

જૂન ૮, ૨૦૧૪