બીજનાં મધ્યમાં...

બીજનાં મધ્યમાં સૃષ્ટિ છૂપી છે,
ફળદ્રુપ માટી ને જળસીંચાવની તૃટિ છે.

જીવંત કણોનો સમૂહ સંગઠિત છે,
કૂંપળનો વેષ પહેરવાની દૂરી છે.

ગર્ભમાં ક્ષમતા ભરપૂર ભરી છે,
અંકુરિત વૃત્તિને ઊભરવાની છેટી છે.

સાક્ષાત બ્રહ્માંડ લખલૂટ અહી છે,
સૂક્ષ્મને પ્રત્યક્ષ થવાની કમી છે.

બીજમાં બીજ એમ સાંક્ળ લખી  છે,
સમયમાં સર્જન ને સમજની ક્ષતિ છે.

જાતજાતનાં રંગરૂપની સ્થિતી રચી છે,
સંરચના સ્વભાવ ને બદલાવ ગતિ છે.

સૃષ્ટિ એક પછી બીજું રચતી જ રહી છે 'મોરલી',
યોજન કયાં, વચ્ચે જગ્યા ક્યાં ખાલી જ પડી છે?

-         મોરલી પંડ્યા
ફેબ્રુઆરી ૨૦૧૫