ગમે ત્યાં હોવ પણ 'ત્યાં'...

ગમે ત્યાં હોવ 

પણ 'ત્યાં' હોવ છો.

કંઈપણ કરતાં હો

પણ 'ચરણો'માં હોવ છો.

ગમે તે બોલાય

પણ 'એ' જ સાંભળો છો

ગમે ત્યાં ગમે તે

પણ એને જ સંભાળો છો.

ગમે તેટલાં વ્યસ્ત 

'એ' જ સ્મરો છો

ગમે ત્યાં પ્રવૃત

પણ 'એનાં' જ સ્મરણમાં છો.

ગમે તે થાય

'એ' જ અગ્રેસર રાખો છો

ગમે તેનાથી અનુભવાય

પણ 'એની' જ અગ્રિમતામાં છો.

ગમે તે જરૂરી 

'એ' જ આવશ્યકતા છો

ગમે તે અનાવશ્યક 

'આવશ્યકતા'માં જ જુઓ છો.

ગમે તે પળ પ્રસંગ

'એની' જ ઘડી જીવો છો.

ગમે તેવી ઘડાઈ

'મોરલી' એની જ દીધી છો.

સક્રિય સંધાન, જાગ્રત સંનિધિ પછી સ્મરણ કરવાનું ક્યાં રહે...

એ તો થઈ જાય...

થયા કરતું હોય...

સ્વીકૃતિ અહીં પરસ્પરની અપાઈ હોય...

એક પક્ષ ભલે માનવીય ન હોય પણ શ્રદ્ધા, નિષ્ઠા અને પ્રેમમાં એ અદ્રશ્ય સથવારો જાણે બીજા પક્ષ સાથે જડાઈ ગયેલો હોય...

અવલંબન અને અનુસરણ ખોખલું નહીં પણ સામે જવાબદારી ઊપાડતું હોય એ સાથ ને સાથીદારીને નવાજતું હોય...

પરસ્પરનાં સન્માનમાં પોતપોતાનું હોવું પૂર્ણતા મેળવતું હોય...

એ જ જ્યાં સંદર્ભ બની ગયો હોય ત્યાં પછી પ્રયત્ન કે રણનીતિ થોડી રહે!

એ સ્વયંભૂ સહજ સ્થિતિ બની રહી હોય.

ઊઠતાં જાગતાં કે કોઈપણ ક્રિયામાં પરોવણી એથી જ હોય...

એ જ પ્રભાવી વિચાર, ભાવ ને સંવેદના બની રહે...

એક સઘન, ઘટ્ટ વાતાવરણ રચાયું હોય...

એ જ ખોરાક અને આત્માને પોષકતત્વ દેતું હોય...

પાચક કોષો પણ એનાં જ દ્રવ્યે પચાવતાં હોય અને તૃપ્તિનાં ઓડકાર પણ અહીંથી જ નીકળે...

સથવારી જયાં પ્રભુસાથની હોય પછી,

આખેઆખું સંયોજનમાં ચાલતું, સાબદું તંત્ર...

જય હો!

સાદર...

- મોરલી પંડ્યા 

મે, ૨૦૧૭

Flower Name: Plumbago auriculata Alba'

Cape leadwort 

Significance: Presence 

It is the Divine Presence that gives value to life. This Presence is the source of all peace, all joy, all security.